ILOILO CITY- Wala sa gihapon nagbalik sa normal ang operasyon sang Ramon Q. Avancena Hall of Justice bangod sang epekto sang Coronavirus disease pandemic.
Sa interview sang Bombo Radyo kay Hon. Judge Victorino Maniba Jr., masami nga ginapatigayon lamang court hearing paagi sa video conferencing ilabi nagid sa mga Persons Deprived of Liberty.
Ang judge, ang interpreter kag ang stenographer gid lamang ang yara sa sulod sang court room samtang ang abogado kag ang akusado ang naga- attend pinaagi sa video conference.
Sa face to face nga hearing naman, wala na ginapahanugutan nga magsulod ang pamilya sang magtimbang nga bahin kag ginplastar ang court room nga nagaobserbar sang social distancing.
Suno kay Maniba, may yara sang pagnubo sa numero sa kaso nga gina- file sa nasambit nga korte bangud sa community quarantine nga ginapatuman sa diin kalabanan ang yara lang sa sulod sang balay nga nagresulta naman sa pagnubo sang numero sang krimen nga nagakatabo.
Dugang pa ni Maniban, kalabanan sa mga kaso subong amo ang mga civil cases kag mga violations sa Bayanihan To Heal as One Act.
Naka work from home naman sa gihapon ang pila ka empleyado sa Hall of Justice kag kalabanan sang trabaho ang ginahimo nalang online.
Ginalimitahan na subong ang pag- schedule sang cases kag ang mga backlogs ang ginatapos pinaagi sa online hearing.
