ILOILO- Nabaton na sang Philippine Charity Sweepstakes Office -Iloilo ang direktiba nga naga-lift sang suspension sang lotto operation.
Sa interview sang Bombo Radyo kay Jeanette Lloyd, branch manager sang Philippine Charity Sweepstakes Office -Iloilo, iya ginpahayag nga umpisa subong nga adlaw, mahimo na liwat nga maka-operate ang mga lotto outlet sa Iloilo.
Gin-athag ni Lloyd nga magluwas sa lotto, magapabilin gihapon nga suspendido ang Small-Town Lottery (STL), Keno kag Peryahan ng Bayan tubtob wala pa natapos ang ginapatigayon nga imbestigasyon sa alegasyon sang iligal nga aktibidad kag korapsyon.
Sa isyu sang korapsyon, ginpahayag sang branch manager nga diri sa Iloilo, ang tanan nga gina-remit sa ila talatapan ang naka dokumento kag ila ini gina-forward sa Manila.
Suno pa kay Lloyd, gin-audit naman sila sang Commission on Audit apang ang resulta sang audit ang mahimo gindiretso na sa general manager sang Philippine Charity Sweepstakes Office sa Manila ukon kay Presidente Rodrigo Duterte.
Samtang, nagpasalamat naman ang opisyal sa nangin tikang sang Presidente.
Partikular man nga ginpasalamatan niya ang Bombo Radyo sa pagbulig sang pagpalapnag sang nasambit nga impormasyon.
