MANILA- Magabalik na sa kinaandan ang operasyon sang mga korte nga yara sa mga lugar nga ginpaidalom sa General Community Quarantine.
Suno sa Korte Suprema, ang tanan nga branch sang Korte nga yara sa General Community Quarantine, ang magapatigayon sang physical operastions humalin 9:00 sa aga tubtob 4:00 sa hapon sa idalom sang rotation kag skeleton workforce.
Pahanugutan man ang Civil Weddings, apang kinahanglan nga sundon ang nagakaigo nga health protocol sa diin limitado lamang sa lima ka persona ang mahimo makatambong.
Suspendido naman ang mga Night kag Saturday Courts tubtob sa Mayo 30 lakip na ang pagpatigayon sang flag raising kag flag retreat.
Ginadumili-an man ang physical inquiries sa mga kaso kag iban nga mga transaksyon kag sa baylo, ang nasambit nga mga butang ang mahimo pinaagi sa pagtawag sa hotline numbers, pagsend sa email ukon Facebook account.
