Wala pa gihapon nagbalik sa normal ang operasyon sang pila sa dalagku nga mga negosyo sa nagkalain-ain nga parte sang kalibutan kasunod sang global outage sang Microsoft services nga nagsugod kahapon sang hapon.
Lakip sa nagapanguna nga apektado amo ang airlines, airports, bangko, media, telecommunications firms, kag iban pa nga mga institusyon lakip na sa Pilipinas.
Suno sa Microsoft, mahimo nga indi gihapon ma-access sang users ang nagkalain-lain nga Microsoft 365 apps kag services apang nagpasalig ang kumpaniya nga nahahimo ini sang “mitigation actions” sa tunga sini nga service disruptions.
Diri sa Pilipinas, nagpaguwa naman sang official statement ang Department of Information and Communications Technology nga gina-monitor sini ang global IT system outage paagi sa Cybersecurity Bureau kag National Computer Emergency Response Team.
Gin-athag man sang ahensya nga ini nga problema ang indi tuga sang hacking ukon cyberattack kundi isa ka faulty update kag wala pa sang kasiguruhan kun san-o dalayon nga makay-o. Santo man ini sa statement ni George Kutz, presidente kag CEO sang U.S. cybersecurity company nga CrowdStrike nga indi ini security incident ukon cyberattack, kag na-identify na nila ang isyu, na-isolate, kag padayon nga ginakaayo.
Ginsiling sang DICT nga lain ang ila nga cybersecurity service provider kag wala sang systems ukon assets ang ahensya nga apektado.
Sa bahin sang Bangko Sentral ng Pilipinas (BSP), ginpasigurado sini nga wala sang dapat kabalak-an ang mga Pilipino bangud indi gid tuman nga apektado ang financial sector sang Pilipinas.
Apisar ginpanindugan sini nga may alternatibo nga channels kag digital platforms nga available para sa mga indibidwal kag Negosyo, gin-ako sang bangko nga pila sa BSP-supervised financial institutions ang naka-eksperyensya sang disruptions apang na-address na kag nakabalik na ang iban sa operasyon.
Sa Ninoy Aquino International Airport naman, naggilinutok kag naglawig ang pila sang mga pasahero bangud sa pagkaatrasar sang flights bangud naapektuhan man pati ang major budget carriers nga Cebu Pacific kag AirAsia Philippines.
Bangud sini, nagsugod ang pila sa airlines sa manual gid lamang nga proseso sa check-in counters kaangay man sa sitwasyon sa airports sa iban nga mga pungsod kangay sa US, Germany, Espanya, Singapore, Netherlands, Portugal, India, Dubai, France, kag madamo nga iban pa.#
(AFP)
