ILOILO CITY – Nabudlayan ang mga miyembro sang SWAT team nga sudlon ang gina-arkilahan nga puluy-an sang drug lord nga si Richard Prevendido sa Barangay Balabago, Jaro, Iloilo city.
Ginpahayag ni Iloilo Provincial Police Office (IPPO) director S/Supt. Marlon Tayaba nga nagserbe ground commander sa ginpatigayon nga “COPLAN Bato Bantiling Charlie”, walo ka bulan nga gindihon ang madinalag-on nga operasyon.
Nag-recruit ang otoridad sang tinawo mismo ni Prevendido agud may access sa drug lord kag makakuha sang impormasyon.
Nagpatigayon man sang operational research ang kapulisan kun sa diin ila ginhibalo ang tanan nga mga propiedad ni Prevendido kag mga utod sini nga mahimo panaguan sang drug lord.
Lakip sa mga ginkadtuan sini ang beach resort sa San Joaquin, Iloilo; rest house sa Daragan, Buenavista, Guimaras; breeding farm sa Anilao, Iloilo; isa ka balay sa subdivision sa Pavia, Iloilo.
Nagpanago man ini sa Oton, Iloilo; Dumarao, Capiz; Buenavista, Guimaras; banwa sang Dumangas, Janiuay kag Lambunao sa Iloilo.
Mabudlay nga dakpon si Prevendido suno kay Tayaba bangud madamo ini sang lookout kag may ginabuligan ini nga Aeta community nga nagabulig man sa iya.
Apang natabo ang breakthrough sang Abril 2017 sang isa ka sibilyan ang naghatag sang impormasyon nga sa Jaro nagapanago si Prevendido nga ginkumpirma man sang tinawo sang drug lord.
Antes ginpatigayon ang operasyon, kinahanglan pa magpalupad ang mga otoridad sang drone agud masiguro nga sa puluy-an si Prevendido.
Wala sang gin-gamit nga cellphone kag ang apat lang ka lider sang police operation ang may komunikasyon.
Ginpahayag ni Tayaba nga nagbaliskad kag nagkaladagdag pa sa hagdan ang mga katapo sang SWAT matapos nga ginbutangan ni Prevendido sang mantika ang salog kag mga hagdan.
Apat na ka bulan nga nagapanago si Prevendido sa nasambit nga balay apang wala bisan isa sa mga kaingod balay sini ang nakahibalo nga ang drug lord ang nagapanago sa nasambit nga balay.