ILOILO CITY – Magapatigayon sang pagsinapol ang Philippine National Police sa mga operators sang food delivery sa Western Visayas.
Ini ang kasunod man sang pagkadakop sang isa ka food delivery rider sa drug buy bust operation sa C1 road Brgy. San Jose Arevalo, Iloilo City sa diin nakuhaan ini sang masobra P1 million nga balor sang iligal nga droga.
Ang arestado amo si Francis Tono , alias ” Francis”, 47, residente sang Bangkiling Street Brgy. Bakhaw Mandurriao, Iloilo City kag isa ka High Value Individual.
Sa interview sang Bombo Radyo kay Police Brigadier General Jack Wanky, Regional Director sang Police Regional Office 6, iya ginpahayag nga makaalarma ang nasambit nga hitabo sa diin mangin ang mga food delivery rider ang nagaduso na sang iligal nga droga.
Suno kay Wanky, ang nasambit nga rider ang nagabaligya sang droga sa iya mga customers pinaagi sa pagtago sa putos sang lechon manok.
Nagpanawagan man ini sa mga kumpaniya nga magpatigayon sang background check sa mga naga-apply nga mangin food delivery rider.
