Temporaryo nga ginsirado ang opisina sang Department of Labor and Employment (DOLE) Region VI lakip na ang sa Iloilo City Field Office.
Ini ang kasunod sang ginpatigayon nga disinfection kag contact tracing matapos nagpositibo ang pila ka mga empleyado sang nasambit nga mga opisina.
Sa interview sang Bombo Radyo kay John Mandario, spokesperson sang DOLE Region VI, iya ginpahayag nga wala pa sila sang data nga ginakaptan kun pila ang pat-od nga numero sang ila mga empleyado nga nagpositibo sa COVID-19.
Suno kay Mandario, sa Iloilo City Field Office sang DOLE, may yara lamang subong sang ginapatigayon nga skeletal work force agud ma-akomodar ang mga urgent transactions.
May dropbox man nga ginpahamtang sa gwa sang nasambit nga opisina sa diin mahimo makahulog ang mga kliyente sang ila dokumento kag iban pa nga concerns.
Via online man suno sa natungdan ginapatigayon ang pila nila ka mga trabaho.
Paathag ni Mandario sa publiko, apisar ginalimitahan ang face-to-face transaction sang ila mga opisina, wala naman nagauntat ang ila trabaho.
