ILOILO CITY – Nagpaathag ang pamunuan sang Philippine Statistics Authority Region 6 sa pagdugok sang mga tawo sa gwa sa ila opisina sa Iznart Street, Iloilo City Proper.
Sa exclusive interview sang Bombo Radyo kay Mary Grace Dorilag, Registration officer 4 kag Outlet supervisor sang Philippine Statistics Authority, iya ginpahayag nga madamo ang nagakuha sa subong sang ila mga dokumento ilabi na sang birth cetificate matapos naapektuhan ang ila operasyon bangud sa COVID-19 pandemic.
Suno kay Dorilag, maga-umpisa na bwas ang registration para sa national ID sa diin isa sa mga kinahanglan amo ang birth certificate.
Magluwas sini, madamo man sang mga nagakuha sang birth certificate para sa school requirements kag travel abroad.
Ginpahayag ni Dorilag nga may mga nagakuha man sang death certificate kag marriage certificate.
Nagpanugyan man ang natungdan nga mahimo man ang mga ini magkuha sang ila dokumento sa mga isa ka mall sa Delgado Street, Iloilo City Proper kag sa Mandurriao, Iloilo City kag sa tagsa ka mga munisipyo.
Nahibaluan nga ang maximum nga mapanagtag nga dokumento sang Philippine Statistics Authority ang nagadangat sa masobra 2,500 kada adlaw.
