Nagdepensa ang opisyal sang Barangay Dalid, Calinog, Iloilo sa alegasyon nga may kaangtanan ang ila barangay sa ginapatihan nga illegal quarry operations sa lugar.
Sa interview sang Bombo Radyo kay Punong Barangay Geronimo C. Peñaflorida, ginpanginwala sini nga sakop sang ila barangay ang quarry site nga ginapatihan nga gin-inspkesyon sang Provincial Environment and Natural Resources Office ukon PENRO.
Suno kay Peñaflorida, ang quarry site yara na sa sakop sang Barangay Cabudian, Dueñas kag indi na sakop sang Barangay Dalid.
Ginpahayag man sini nga nagaagi lamang sa ila barangay ang mga truck nga may karga halin sa quarry site kag kada mag-usisa ang barangay sa mga truck nga nagaagi sa ila lugar, ginapakita man sang mga operator ang ila kumpleto nga dokumento kag trip tickets.
Ginpabutyag man sang opisyal nga wala sang kooperasyon ukon partisipasyon ang Barangay Dalid sa quarry operations.
Suno pa kay Peñaflorida, ang source sang quarry materials yara sa Cabudian, Dueñas kag indi sa Barangay Dalid, Calinog.
