Nagapangayo sang bulig ang pila ka mga opisyal sang Brgy. Calaparan, Arevalo, sa Iloilo City Government agud mabuligan sila sa ila nga problema sa tubig.
Sa interview sang Bombo Radyo kay PB Renante Tubola sang Brgy. Calaparan Arevalo, Iloilo City, iya ginpahayag nga bangud sa mainit nga tyempo, naka-eksperyensya man sang kabudlayan kag kakulangan sa tubig ang ila nga mga residente sa ila nga barangay.
Suno kay Tubola nga nagakinahanglan sila sang dugang nga tatlo ka mga tangke ukon drum sang tubig agud mabutangan sang ila ma-stock nga tubig.
Nahibaluan nga may ara sang libre nga ginahatag ang syudad nga tubig para sa pumuluyo sang barangay gani nga nagakinahanglan sila sang dugang nga mabutangan.
Pahayag pa ni Tubola nga ini nga mga drum ang magamit gid sang ila pumuluyo kun sa diin ginaplano nila nga ipahamtang ini sa mga strategic areas agud mangin accessible sa ila mga pumuluyo.
Dugang pa ni Tubola nga ini makapahagan-hagan gid sa kabudlayan nga na-eksperyensyahan sang ila nga mga pumuluyo kun mahatagan katumanan ang ila pangabay sa City Government.
