πππ’πππ’ πππ§π¬ βNagpaandam ang punong barangay sang Barangay Loboc, Lapuz, Iloilo City sa mga operators sang trailer truck nga naga-park sa nasambit nga lugar apisar nga makapila na ka beses nga sila ang na-ticketan.
Sa interview sang Bombo Radyo kay Punong Barangay Pancho Vijuan sang Brgy. Loboc, Lapuz, iya ginpahayag nga sang Mayo 22, 2024 pa sang siya ang nagsulat sa Public Safety and Transportation Management Office (PSTMO), Iloilo City Traffic Management Unit (ICTMU), kag Land Transportation Franchising and Regulatory Board (LTFRB) agud nga magpangayo sang assistance paagi sa road clearing sa dalan bangud madamo sang iligal nga naga-park sa amo nga lugar.
Suno kay Vijuan, tuyo sang tikang nga mabuligan ang barangay sang mga talatapan agud nga mapahalin ang mga trailer truck sa lugar bangud tuman na ini ka delikado sa mga nagalabay nga motorista kag residente.
Ginpahayag man sini nga sang Hunyo 18, 2024, nagpadulong ang pila ka otoridad sa amo nga lugar agud nga ticketan ang mga truck nga iligal nga naga-park sa amo nga dalan.
Apang tubtob subong nga bulan, may yara sa gihapon nga mga trailer truck ang naga-park sa dalan, nga nangin rason man sang pagkabunggo-patay sang isa ka motorista sang damlag lang.
Ginbulgar man sang punong barangay nga masami nga makit-an sa lugar ang mga trailer truck kon gab-i lamang, kon sa diin, container na lang ang nabilin pagka-aga bangud nga nahadlok ang mga drivers nga madakpan sang otoridad.
