Gintuad sang mga barangay officials sang Barangay Tacas, Jaro kon paano nila na-rescue sang apat sa lima ka mga menor-de-edad nga nagpalagyo sa Balay Dalayunan sa Barangay Bo. Obrero, Lapuz, Iloilo City.
Sa interview sang Bombo Radyo kay Punong Barangay Joseph Poral sang Tacas, Jaro, iya ginpahayag nga insigida nga nagpadala sila sang mga otoridad lakip na sa nagbulig ang barangay tanod agud maglibot.
Ini kasunod man sa report nga ang mga menor-de-edad ang nagpanghold-up sang isa ka babaye sa area sang Muelle Loney Street.
Suno kay Poral, ang isa sa lima ka mga menor-de-edad ang nadakpan samtang nagalakat-lakat.
Samtang, matapos nga na intercept ang isa, gintudlo sang pumuluyo nga yara ang nabilin nga apat sa isa ka balay apang natukiban nga wala na sila didto pag-abot sang otoridad.
Liwat naman nga ginlibot nila ang sakop sang San Isidro, Jaro kon sa diin, nasugat-an sini ang duha kag gilayon nga nadakpan kag ginsakay sa pick up agud i-turnover sa barangay hall.
Ginpahayag man sini nga ang nabilin nga isa ang nadakpan sa Brgy. Quintin Salas, Jaro.
Gin-athag naman sang Iloilo City Social Welfare and Development Office (CSWDO) nga may ginguba sa pasilidad ang mga menor-de-edad rason nga nakaguwa.
Suno kay Teresa Gelogo, head sang Iloilo City Social Welfare and Development Office, may security guard, jail guard, kag may house parents nga nagabantay sa mga kabataan.
Apang, daw kaangay nga wala nagakatulog ang mga menor-de-edad rason nga nakahimo sang paagi agud makaguwa suno sa natungdan.
Ginahulat naman sang talatapan ang pahayag sang in-charge sa Balay Dalayunan sa amo nga tion agud mapaathag kon ngaa nakapalagyo ang mga kabataan.
