Gin-athag sang opisyal sang Barangay Ungka II, Pavia, Iloilo nga wala sang malain nga record ang mag-utod nga suspek sa pagtiro-patay sa stay-in driver ni Land Transportation Office (LTO) VI director Atty. Gaudioso P. Geduspan II sa Parc Regency Subdivision, Brgy. Ungka 2, Pavia, Iloilo kagab-i, Abril 3.
Ang biktima amo si Wilmer Casquite Villaros, legal ang edad, kasado, residente sang Janiuay, Iloilo, apang temporaryo nga nagatinir sa amo nga subdivision.
Samtang ang mga suspek, amo sanday Jay-R, 40, kag Boy, 45, kag nagaalegar nga taga-Barangay Aldeguer, Sara apang may I.D. nga nagapakita nga taga-Pampanga.
Sa interview sang Bombo Radyo kay Nelson Mandadero, Kagawad sa Barangay Ungka II, Pavia, iya ginpahayag nga bukas ang ila barangay sa kon sin-o ang may reklamo batok sa mga suspek agud man nga makahatag sila sang dugang impormasyon sa dalagan sang kaso.
Suno kay Mandadero, santo sa ila data sa barangay, wala sang nagapatumod ukon nagapakita nga may nagakatabo nga indi maayo sa bahin sang mga suspek kag sang biktima.
Una na nga gintuad sang amay sang mga suspek nga lunsay tumandok sang Sara ang iya mga anak, apang nagapuyo man sa Pavia bangud sa may balay sila sa amo nga lugar.
Kon balikan, na-aresto ang duha ka suspek paagi sa checkpoint sang Sara Municipal Police Station kag sa bulig sang description nga ginhatag sang Pavia police lakip na ang plate number sang salakyan nga Isuzu Crosswind nga ila gingamit sa pagpalagyo.
Nakumpirma nga sila ang mga suspek paagi sa closed circuit television (CCTV) footage nga ginpakita sang Pavia MPS sa pulis sa Sara kun sa diin nagasanto pati ang itsura kag mga panapton.
