BANTUD, LA PZ, ILOILO CITY– Ginpasigurado sang mga opisyales sang Barangay Bantud, La Paz, Iloilo City nga ang nadala sa listahan sang mga makabatun sang cash aid sa idalom sang Social Amelioration amo ang mga kwalipikado nga pumuluyo.
Sa interview sang Bombo Radyo kay punong barangay Marie Michelle Paloma, iya ginpahayag nga iya ginsiguro nga ang cash aid ang mahatag sa mga pumuluyo nga nagakinahanglan sang bulig gikan sa gobyerno.
Suno kay Paloma, sa pagpili sang mga benipesyaryo, ginsunod lang nila ang guidelines nga ginhatag sang Department of Social Welfare and Development sa diin ang mga may yara sang himata sa abroad ang indi mahimo nga ma qualify.
Pahayag pa niya, halos nadugayan man sila sa pagproseso, bangud ginpasigurado nila nga husto ang mangin resulta sang validation sang mga makabatun sang P6,000.
Magluwas sini suno sa punong barangay, may tatlo man ka mga benipesyaryo ang nagwaive sang ila amelioration sa diin, ang mga natungdan mismo ang personal nga nagpamat-od nga indi na sila magkuha pa sang cash aid.
