Nabuhian sang paglaom ang mga opisyales sang Brgy. Linobayan, Tigbauan, Iloilo matapos magpalab-ot sang simpatiya kag suporta sa ila si Iloilo First District Representative Janet Garin.
Ini kaangot sa ila problema sa poultry farm nga nagaka-apekto sa ila residente bangud nagadala sang perwisyo sa ila nga lugar.
Sa interview sang Bombo Radyo kay Punong Barangay Rene Taño sang Brgy. Linobayan, Tigbauan, Iloilo, iya ginpahayag nga dako nga bagay ang suporta nga ginpakita ni Garin para sa ila.
Suno pa kay Taño, nagpakig-angot na ang kongresista sa Department of Environment and Natural Resources amo man sa iban nga hensya sang gobyerno.
Ini agud makabulig sa paghatag solusyon sa problema nga ginapangatubang sang mga residente sang Barangay Linobayan.
Dugang pa sang Punong Barangay nga bangud sa pagahatag sang igtalupangod sang kongresista, mas nangin mabaskog ang ila pagpati nga makuha nila ang hustisya.
