ILOILO CITY — Nangin emosyonal ang pila ka opisyales sang Barangay Pali Bendicto, Mandurriao, Iloilo City lakip na si Iloilo City Lone District Representative Jamjam Baronda matapos nga ginpatyan sila sang musika ni Punong Barangay Allan Juarez samtang nagahiwat sang isa ka event.
Sa interview sang Bombo Radyo kay Kagawad Romina Gratis, iya ginpahayag nga sila nga mga kagawad ang nag-organisa sang kahiwatan nga TikTok Challenge, sa diin personal sini nga gindul-ong ang invitation letter kay Cong. Baronda.
Suno kay Gratis, wala siya naglaum nga mag-abot ang mamalidha bangud naggikan pa ini sa isla sang Boracay kag naghapit lang ini agud magtambong sa nasambit nga kahiwatan.
Ginpahayag ni Gratis nga natapos na ang event sang nag-abot ang kongresista apang sang matapos ini nga nag-speech, naghatag ini sang kahigayunan nga magsaot kaupod ang mga opisyales kag participants sang TikTok Challenge.
Samtang nagasaot, nag-abot si Punong Barangay Allan Juarez kag deretso nga nagpadulong sa sound operator kag ginpapatay ang music.
Gilayon nga gintawag ni Juarez si Kagawad Gratis kag ginhambalan nga wala ini sang respeto bangud sa ginapahayag nga wala ini nakalisensya agud ipatuman ang amo nga kahiwatan.
Nagpaathag naman si Gratis nga nakalisensya ini apang wala lang natalupangdan ni Juarez bangud man sa may mga gina-asikaso ini samtang siya ang nagalisensya.
Ginpanginwala man ni Gratis nga siya ang nagapamulitika bangud tuyo lang sini nga maghatag sang kalingawan sa ila nasakopan nga residente.
Dugang sang natungdan nga matapos maghambal ang punong barangay, nagpahayag man si Baronda nga wala ini nagapamulika kag siya nagpadulong bangud nagapungko sa gihapon bilang kongresista sang syudad.
Gilayon naman nga naglisensya si Baronda nga magpauli matapos magluntad ang indi pag-intindihanay sa tunga sang kagawad kag sa punong barangay.
Nahibaluan nga naman nga ang utod ni Kagawad Gratis ang anay man nangin kagawad sa amo nga barangay kag nagaserbi bilang staff ni Congresswoman Baronda.
