Naka-alerto sagihapon ang pila ka mga barangay sa siudad sang Iloilo ilabi na ang yara sa mga coastal areas matapos nga nagsulod na Bagyo Basyang sa Philippine Area of Responsibility.
Sa interview sang Bombo Radyo kay Punong Barangay Judy ‘Nonoy’ Navales sang Rizal Palapala II nga isa man ka coastal barangay, iya ginpahayag nga nagrekorida na kagab-i ang ila mga opisyales agud nga maghatag sang pahanumdom sa publiko ilabi na ang pag-evacuate kun kinahanglanon.
Suno kay Navales, mabudlay ang pagpa-evacuate sa mga pumuluyo bangud nga madamo sa mga ini amo ang nahadluk nga bayaan ang ila nga mga puluy-an rason nga nagapangduha-duha pa ang mga residente.
Pahayag pa niya nga yara sa 20 ka mga panimalay ang ginakabig nga yara sa coastal area sa barangay.
Dugang pa ni Navales nga samtang wala pa sang madamol nga ulan, mas maayo nga preparahan gid ang mga kinahanglanun inkaso kinahanglan na nga mag-evacuate.
