𝗜𝗟𝗢𝗜𝗟𝗢 𝗖𝗜𝗧𝗬 — Nagpanugyan ang mga opisyales sang Brgy. San Pedro, Jaro, Iloilo City sa residente nga ipahibalo sa ila kun sila ang may mga bisita nga foreign nationals.
Sa interview sang Bombo Radyo kay Punong Barangay Alex John Jover, iya ginpahayag nga kinahanglan ipahibalo man sa ila sang mga residente kun sila ang nagabaton sang bisita nga foreigners ilabi na kun Chinese Nationals.
Suno kay Jover, ang tikang ang isa ka pamaagi agud matumod ang kun ano nga business ukon kahiwatan ang ginahimo sang mga foreign nationals.
Ginpahayag man sini nga mangin palaagyan man ang pagpahibalo sa ila agud nga maalerto ang kapulisan sa mga iligal nga buluhaton sa ila nga barangay.
Ginpaathag man sang natungdan nga sa subong, wala sila sang may nabaton nga report nga may mga Chinese Nationals nga nagapuyo sa ila nga lugar.
Kalabanan man suno kay Jover sa foreign nationals nga yara sa ila lugar amo ang Korean kag Indian Nationals nga ginlaragway sini nga maayo nga mga tawo.
