ILOILO CITY – Nagakinahanglan nga padayon ang pagpatuman sang Oplan Hawan sa syudad sang Iloilo.
Sa interview sang Bombo Radyo kay Mr. Love Joy Hosenilla, pinuno sang Task Force on Anti-Squating and Illegal Structures Unit, iya ginpahayag nga nakapaguwa na sang memorandum ang Department of Interior and Local Government kag si Iloilo City Mayor Jerry TReñas sa diin sakop sang road clearing operations ang mga barangay road.
Suno kay Hosenilla, nagakinahanglan nga ipabilin ang katinlo sa mga dalan bangud nga may yara sang re-evaluation nga patigayunon.
Ginpahayag ni Hosenilla nga indi matigayon ang Oplan Hawan kun indi pagbuylugan sang tanan nga barangay official.
Samtang, ginpromisa ni Hosenilla nga mangin patas sa pagpatuman sang Oplan Hawan matapos ang pagpa-blotter sang tiayon ni Task Force on Moral and Values Formation Head Nestor Canong bangud nga ginbutangan sang ekis ang porsyon sang ila balay nga nagalaksam sa dalan sa Brgy. Railway, La Paz, Iloilo City.
Suno kay Hosenilla, bisan nga nabutangan na sang ekis ang porsyon sang balay ni Canong apang indi pa nila ini madali-dali sa pagguba.
Ginpahayag ni Hosenilla, antes gub-on, kinahanglan nila anay usisaon kun bala may yara sang dukomento nga gina-uyatan ang tag-iya nga makapamatuod nga indi dapat paggub-on ang balay.
Indi niya luyag suno kay Hosenilla nga dugangan ang tensyon sa tunga sang pamilya Canong kag ni Punong Barangay Reynaldo Guillargan rason nga kinahanglan nga mangin patas sa tanan ang pagpatuman sang Oplan Hawan.
