ILOILO CITY – Ginpasalig sang composite team nga nagapatigayon sang Oplan Hawan nga ila maubos sa pagpangkuha ang obstruction sa mga national road sa syudad sang Iloilo.
Sa interview sang Bombo Radyo kay Love Joy Hosenilla, pinuno sang Taskforce on Anti-Squatting and Illegal Structures Unit, iya ginpahayag nga buwas nga adlaw, ang distrito sang Jaro ang target sang Oplan Hawan team.
Subong nga adlaw suno kay Hosenilla, gintutukan sang Oplan Hawan team ang distrito sang City Proper kag La Paz.
Suno kay Hosenilla, bisan ang mga barangay hall ukon government building nga makabig nga obstruction ang ila gid nga gub-on.
Tuhoy naman sa pamangkot kun bala matapos ang pagpanghawan sa mga barangay road, ginpahayag sang natungdan nga indi nila maubos pangguba ang mga obstruction bangud nga may mga nagapakatig-a sa gihapon nga magsunod sa Oplan Hawan.
Nahibalu-an nga kutub na lang sa Setyembre 29 ang plaso nga ginhatag sa tagsa ka mga Local Government Unit agud nga makuha ang tanan nga obstruction sa dalan.
Kun mapaslawan, pahagatagan sang preventive suspension ang local chief executive ukon alkalde sang lugar.
