Ginkumpirma sang long-time girlfriend ni Hajji Alejandro ang naglapta nga mga impormasyon nga naga-suprer ang OPM icon sang stage 4 colon cancer.
Suno kay Alynna Velasquez, nagpaidalom ang 70-anyos nga singer sa surgery, may naangkon nga infection kag gindala pa anay sa intensive care unit (ICU) bangud nagakalipong, apang naga-recover na ini subong sa ila balay.
Gin-ako man ni Velasquez nga ginbasol siya sang pamilya ni Hajji sa nagguwa nga reports kag videos nga yara pa sa ospital ang singer.
“I was blamed by the family. The family wanted it to be private and I respect it. Pero nung naging critical si Hajji, I had to tell someone, I had to tell his best friend.” Pahayag pa sang girlfriend, siya man ang nagkuha sang video ni Hajji kag sang iya iloy sa ospital. Bisan nabasulan, nagpasalamat si Velasquez bangud madamo nga tawo ang nagpangamuyo para sa recovery sang OPM icon.
Ginsaysay man sang nobya nga nagagamit subong si Hajji sang walker bangud ginatun-an sini liwat ang paghulag kag paglakat, apang wala man suno sa iya naapektuhan ang tingog kag memorya sang singer.
Kilala si Hajji bilang “Kilabot ng mga Kolehiyala” sang ’70s kag ’80s kag na-establisar bilang isa sa icons sa Philippine music industry.
Lakip sa iya major hits amo ang “Nakapagtataka”, ”Tag-Araw, Tag-Ulan” kag ang “Kay Ganda ng Ating Musika” nga amo ang nagpadaog sa iya sang grand prize sa 1978 Metropop music festival.#
