Nagbaskog liwat si Opong kag nagbalik sa Typhoon Category samtang nga yara ini sa West Philippine Sea.
Base sa alas singko sa kaagahon nga weather bulletin, Septyembre 27, ulihi nga nakit-an ang sentro sang bagyo sa kalayuon nga 505 km nakatundan sang Indang, Cavite.
Dala sini ang kabaskugon sang hangin nga 120 km/h malapit sa sentro kag pagmadlos nga tubtub sa 150 km/h. Nagahulag ang bagyo sa direksyon nga pa-nakatundan naaminhan-nakatundan sa kadasigon nga 30 km/h.
Sa subong, ang mga lugar nga napaidalom pa sa Signal Number 1 amo ang lunsay yara sa Luzon area nga amo ang masunod: western portion sang Pangasinan, Zambales, Bataan, ang western portion sang Cavite, ang western portion sang Batangas, ang northern portion sang Occidental Mindoro lakip na ang Lubang Islands, kag ang Calamian Islands.
Alas otso kagab-i sang ginbawi na ang tanan nga wind signal sa tanan nga porsyon sang Iloilo.
Sandig sa track forecast sang weather bureau, magaguwa ang Bagyo Opong sa Philippine Area of Responsibility (PAR) subong nga aga ukon karon sa udto.
Sa guwa sang PAR region, magahulag ini pa-nakatundan naaminhan-nakatundan pakadto sa direksyon sang northern Vietnam.#
