ILOILO CITY – Ginkakibot sang oposisyon sa Senado ang pagbaliskad sang mga kaalyado ni Presidente Rodrigo Duterte sa Commission on Appointments, may kaangtanan sa appointment ni Department of Environment and Natural Resources (DENR) Secretary Gina Lopez.
Sa interview sang Bombo Radyo Iloilo, ginpahayag ni Sen. Bam Aquino nga pinasahi ang natabo nga pagbinotohay kahapon sa appointment ni Lopez.
Wala ginalauman sang oposisyon nga mismo ang mga kaalyado ni Presidente Duterte ang magapugong sa appointment sang DENR secretary.
Si Aquino kaupod ang pito pa ka mga senador ang nagboto pabor sa appointment ni Lopez.
Suno sa senador, nakita nila sa oposisyon nga makabulig si Lopez sa pungsod.
Ginatugyan na lang ni Sen. Aquino sa mga Pilipino ang paghusga sa nangin boto sang tagsa ka miyembro sang Commission on Appointments.