ILOILO CITY – Nagalaum ang Makabayan bloc sa Kongreso nga paboran sang Korte Suprema ang ila hingyo nga ipa-nullify ang Tax Reform Acceleration and Inclusion (TRAIN) Law.
Sa interview sang Bombo Radyo kay Bayan Muna Rep. Carlos Isagani Zarate, ginpahayag sini nga may nagakaigo sila nga ebidensiya nga makapamatuod nga wala nag-agi sa husto nga proseso ang pagpasar sa amo nga hagna.
Suno kay Zarate, gindali-dali lang ang pagpasar sini sa katapusan nga session sang Kongreso antes pa man ang Christmas break sa diin wala gani makalab-ot sa 20 ang nabilin nga miyembro.
Dugang pa ni Zarate, makabig nga anti-progressive ang amo nga layi sa diin ang mga excise tax ang ginabalik naman sang mga kompaniya sa mga magagmay nga konsumidor.
Isa pa gid ka rason suno kay Zarate nga kapin P100 billion lang ang tax nga makolekta sa idalom sang TRAIN Law samtang kun paminsaron gid, may kapin P600 billion pa nga wala makolekta sang gobyerno sa mga dalagko nga korporasyon.