ILOILO CITY – Ginpasiguro sang oposisyon sa Kamara nga balabagan sa anuman nga paagi ang kagustuhan ni House Speaker Pantaleon Alvarez nga palawigon tubtob 2022 ang Martial Law sa Mindanao.
Sa interview sang Bombo Radyo Iloilo, ginpahayag ni Magdalo partylist Rep. Gary Alejano nga kaladlawan ang proposal nga ini ni Alvarez kag dapat maghinay-hinay ang lider sang Kamara sa proposal sini.
Ginpakamalaot ni Alejano ang kagustuhan ni Alvarez bangud wala pa gani makasumite sang report ang Executive Department suno sa kongresista, may kaangtanan sa Martial Law nga ginapatuman subong sa Mindanao bangud sang kinagamo sa Marawi.
Suno kay Alejano, ginapangunahan sang House Speaker ang Malacanang apisar nga wala pa ginahingyo sang Palasyo kun palawigon pa ang Batas Militar.
Ang pagpalawig sang Martial Law suno kay Alejano ang pamatuod lang nga indi masarangan resolbahon sang gobyerno ang ginaatubang nga problema.
Ginpaandaman sang kongresista ang Malacanang nga indi magpadali-dali sa nasambit nga lihok bangud dako ang impact sini sa perception sang mga investors.
Ginkuwestyon ni Alejano ang basehan ni Alvarez nga kinahanglan ang Martial Law para tapuson ang problema sa Mindanao bangud may yara man suno diri sang peace agreement sa Bangsamoro kag peace talks sa CPP-NPA-NDF.
Apang posible man suno sa mamalidha nga ginapalutaw lang sang administrasyon ang isyu agud makuha ang reaksyon sang publiko sa ti-on nga palawigon ang Martial Law.