ILOILO CITY – Nagpanawagan si opposition Iloilo City Councilor Plaridel Nava sa Department of Social Welfare and Development Region VI nga kay-uhon ang sistema sa paghatag sang ayuda kag benepisyo sa mga pumuluyo.
Sa pagtambong sang mga staff sang ahensya sa session sang Iloilo City Council, ginpahayag ni Nava nga ang ginahatagan lamang sang ayuda amo ang yara sa administrasyon apisar nga indi kwalipikado.
Sa interview sang Bombo Radyo kay Nava, iya ginpahayag nga madamo na sang kahigayunan nga wala ginasapak ang mga kwalipikado nga rekomendasyon nagikan sa iya opisina.
Suno kay Nava, dapat nga indi magpili sang halatagan ang ahensya kag indi maglantaw sa political affiliation bangud nga iya man sang publiko ang pondo nga ginagamit.
Sa bag-o nga regional director sang Department of Social Welfare and Development Region VI, nagalaum si Nava nga mabag-o na ang sistema kag wala na sang pili ang hatagan sang ayuda.
