ILOILO CITY – Nagpanugyan si opposition councilor Plaridel Nava sa Iloilo City government nga mangin neutral sa tion nga magpasaka sang kaso ang pamilya sang mga napatay batuk sa chief sang Urban Search and Rescue sang City Disaster Risk Reduction Management Office nga nag-drive sang water tanker truck nga nagresulta sa aksidente sa Barangay Baldoza, La Paz, Iloilo City.
Duha ang napatay kag napilasan naman ang 17 ka iban pa matapos nga ginsakyan ni Daryl Darwin Thulasidas ang water tanker truck sa tinutuyo nga mapatadlung ini kag indi mangin obstruction sa dalan apisar sang paandam sang mekaniko nga indi anay ini pagtandugon.
Sa interview sang Bombo Radyo kay Councilor Nava, iya ginpahayag nga pabay-an na lang kuntani sang syudad si Thulasidas nga magkuha sang kaugalingon nga legal counsel nga amo ang magapangapin sa iya.
Dugang pa niya, sa tion nga matukiban nga wala sang kaangtanan sa iya responsibilidad ang iya ginhimo sang natabo ang insidente, wala sang salabton ang syudad ang amo nga empleyado.
Suno pa kay Nava, kuntani, wala na lamang nag-akto nga “superhero” si Thulasidas.
Samtang, ginpahayag ni Nava nga may salabton ang nasambit nga empleyado kaangay sa mga driver nga nagapangatubang sang kaso sa tion nga makabunggo sang tawo apisar nga indi man hungod.
Sa natabo, ginpahayag ni Nava nga posible ini nga mapasakaan sang kaso nga Reckless Imprudence Resulting in Physical Injuries and Multiple Homicide apang wala man sang dapat nga kulbaan ang driver bangud nga manubo lamang ini nga offense kag probationable.
Sa pahayag naman ni Mayor Jerry Treñas nga mahimo sa gihapon nga magtrabaho sa Iloilo City Hall si Thulasidas, ginpahayag ni Nava nga wala man ini sang kaso sa Civil Service Commission gani, mahimo gid ini nga magbalik sa trabaho ilabi pa kun regular employee ini.
Samtang, ginpahayag man ni Nava nga bisan sa diin nga bahin sang Pilipinas, may lapses sa pagresponde sa mga aksidente, indi kaangay sa iban nga pungsod nga nagasunod gid sa protocol.
