Gin-isol ang oral arguments sa kaso nga nagakwestiyon sa legalidad sang Republic Act 11479 ukon the Anti-Terrorism Act of 2020.
Sa interview sang Bombo Radyo kay Jose Manuel “Chel” Diokno, chairman sang Free Legal Assistance Group (FLAG) kag founding dean sang De La Salle University College of Law, iya ginpahayag nga may yara sang pila ka personnel sang Office of the Solicitor General (OSG) nga magatambong sa argument ang nagpositibo sa COVID-19, rason nga ginkonsidera man sang korte nga i-reset ang schedule kag gintalana sa Pebrero 2.
Suno kay Diokno, katuyuan sang oral argument nga mapatpat kag mahangpan ang kabug-usan sang Republic Act 11479 ukon the Anti-Terrorism Act of 2020.
Gin-athag man ni Diokno nga ang pila sa mga procedural arguments nga ila igapatpat amo ang paglapas sang Anti-Terrorism Act sa freedoms of speech, religion, kag association.
Dugang pa niya, tuman ini ka importante bangud apektado diri ang tawhanon nga kinamatarong.
Kinahanglan suno kay Diokno ang madalum kag maid-id nga pagtuon sa Anti-Terror Act.
“Ang Anti-Terror Act ay lumalabag sa ating freedom of speech, freedom of expression..this is a very very important law in the sense na, marami siyang naaapektuhang karapatan natin.. kaya dapat talaga maayos at malalim ang pag-aaral nitong batas na ito,” pahayag ni Diokno.
Ginpahayag sang natungdan, apisar nga na-isol ang schedule sang oral arguments, madugay na sila nga handa para diri.
Nahibaluan nga ang Anti-Terror Act ang nagatapak sa Republic Act 9372 ukon Human Security Act of 2007.
Nasaad diri nga presuhon ang mga ginasuspetsahan nga terorista sang tubtob sa 24 ka adlaw bisan pa wala sang warrant of arrest.
Mapahanugutan man ang pulis ukon militar nga maglunsyar sang 60 ka-adlaw nga surveillance kag 30 ka adlaw nga extension sang pagkapreso sa mga ginasuspetsahan nga terorista.
Ginapatuman man sang layi ang 12 ka tuig nga pagkapreso sa isa ka tawo nga boluntaryo nga makigbahin sa isa ka organisayon sang mga terorista.
