Ginsuguran na sang Supreme Court ang oral arguments sa pagsaylo sang PhilHealth funds sa National Treasury agud gamiton para sa iban nga government projects.
Ginpresentar sang mga petitioners kun ngaa indi constitutional ang pagsaylo sang unused PhilHealth funds.
Partikular nga nagpabutyag sang ila oposisyon ang mga petitioners sa circular sang Department of Finance kag ang probisyon sang General Appropriations Act, nga amo ang naghatag sang ligwa para sa pagbalik sang malapit P90 billion PhilHealth funds sa National Treasury.
Sang nagligad nga tuig, nag-remit ang PhilHealth sang P60 billion sa National Treasury samtang ginpauntat sang korte ang pagsaylo sang nabilin nga P29.9 billion matapos na-file ang petisyon.
Suno kay Atty. Paula Mae Tanquieng, counsel sang petitioners, ang ginakwestyon nga probisyon kag DOF circular ang inconsistent, incompatible, kag irreconcilable sa Universal Health Care Act kag sa Sin Tax Law kun sa diin ang Universal health Care Act ang may maathag nga katuyuan nga maghatag sang social health insurance kag risk protection para sa pumuluyo.
Dugang niya, sa pag-compute sang alleged fund balance, ginsupak sang DOF ang nasaad sa sin tax laws, nga ini nga pondo ang dapat gamiton para gid lang sa universal health care.
Sanday Finance Secretary Ralph Recto, Health Secretary Teodoro Herbosa, Social Welfare Secretary Rex Gatchalian, kag former PhilHealth president Emmanuel Ledesma Jr. ang nagtambong.
Ang mga respondents ang gintiglawas sang Office of the Solicitor General kag Office of the Government Corporate Counsel.
Ang mga respondents nagpanindugan naman nga ang transfer sang PhilHealth funds ang legal kag yara sa konstitusyon.
Suno kay Solicitor General Menardo Guevarra, ang amo nga tikang ang pamaagi sang executive kag legislative department sa paghimo kag pagpatuman sang fiscal policy agud mapasanyog pa ang economic growth nga indi pagpapas-an sa tawo paagi sa bag-o nga buwis.
Ginhingyo naman sang solicitor general nga kakson si President Ferdinand Marcos Jr. bilang respondent bangud nga may immunity ini sa kaso samtang yara sa posisyon.
