ILOILO CITY – Handa na ang mga miyembro sang Order of Asclepius sang West Visayas State University (WVSU)-College of Medicine sa paghatag sang libre nga medical service sa Bombo Medico 2019 sa Hulyo 14 sa Iloilo Science and Technology University (ISATU).
Sa interview sang Bombo Radyo kay Sharmaine Santillan, medical student kag presidente Order of Asclepius, iya ginpahayag nga magabulig sila nga mga medical students sa pagkuha sang vital signs kasubong sang blood pressure, temperature, height kag bug-at sang mga pasyente.
Magluwas sa pagkuha sang vital signs, sila ang magabulig man sa mga medical doctor sa pagpatigayon sang konsultasyon.
Ang Order of Asclepius ang isa ka school-based Non-Government Organization nga ginabug-usan sang mga medical student kag medical doctor sang WVSU-College of Medicine.
Samtang, suno naman kay Dr. Erah Fernandez, Senior Asclepcian Member kag resident doctor sang WVSU medical center, importante nga magpaidalom sa medical consultation ang pasyente agud nga mahibalu-an kun ano nga mga bulong ang nagakadapat nga tumaron.
Sila nga mga doktor suno kay Fernandez ang handa nga magpakigbahin sa Bombo Medico 2019 agud nga magbulig sa mga pigado kag wala sang ikasarang nga magbayad sang consultation fee.
Yari ang pagpahayag sang commitment sang Order of Asclepius sapagpakigbahin sa Bombo Medico 2019.
