ILOILO CITY – Ginahulat na lang ni Police Col. Eric Dampal ang order of designation agud pormal na nga mangin Acting Director sang Iloilo City Police Office.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga si Dampal ang kabahin sang Philippine National Police Academy Class of 1992, tumandok sang Bukidnon apang naga-istar sa Davao City.
Suno kay Malong, antes pa man gin-assign sa syudad sang Iloilo, si Dampal ang anay pinuno sang Regional Plans and Strategy Management Division sa Police Regional Office 11, anay pinuno sang Regional Headquarters Support Unit, nangin Provincial Director sang Compostella Valley, anay pinuno sang Regional Investigation and Management Division sang Police Regional Office 11 kag na-assign man anay sa Police Regional Office CARAGA kag Police Regional Office 10.
Buwas, Miyerkules, magaserbe na si Dampal bilang Acting Director tal-os kay Police Col. Martin Defensor Jr. samtang wala pa sang may napilian si Iloilo City Mayor Jerry Treñas nga mangin full pledged director.
Nahibalu-an nga sang Pebrero 4, nag-abot ang memorandum halin sa Camp Crame nga naga-terminate kay the late Police Col. Marlon Tayaba bilang pinuno sang Regional Staff sang Police Regional Office 6.
Magluwas diri, gin-relieve naman sa pwesto si Defensor bilang director sang Iloilo City Police Office kag magatal-os sa posisyon ni Tayaba samtang si Dampal naman ang magabulos sa anay posisyon ni Defensor.
