ILOILO- Pasado na sa Sangguniang Panlalawigan ang ordinansa, nga magatukod sang agri-information system sa Probinsya sang Iloilo, agud mabuligan ang mga mangunguma kag fisherfolks sang probinsya.
Sa interview sang Bombo Radyo kay 3rd District Board Member Matt Palabrica, iya ginpahayag nga nagasanto sini nga panahon sang pandemya ang pagpasar sang ordinansa, bangud sa subong ang sektor sang agrikultura ang ginatutukan.
Suno kay Palabrica, sa sini nga ordinansa, mangin organisado ang transaksyon sa demand sang tagsa ka mga kabanwahanan, kag ini ang labing una nga kahigayunan nga may agri-information system ang probinsya bangud magagamit ini sang internet.
Kun madamo ang suplay sang isa ka produkto sa partikular nga banwa suno kay Palabrica, kag kun may kulang nga produkto ang iban pa nga kabanwahanan, mahimo nga makahatag gilayun sang suplay pinaagi sa Municipal Agricultures Office
Pahayag pa ni Palabrica, may yara sang inisyal nga pondo nga P1 million sa information office agud mag-establisar sang nasambit nga sistema.
Ang banwa sang Mina suno sa board member ang una nga nakadihon sang amo nga sistema, kag gintanyag ini sang libre sa Iloilo Provincial Government agud nga magamit sa iban pa nga mga kabanwahanan.
Dugang pa sang natungdan, kun mangin mapag-on na ang agri-information system, mahimo ini magamit snag mga alkalde agud hatagan sang igtalupangod ang supply sang produkto sa agrikultura lakip na ang fisheries.
