ILOILO CITY- Pasado na sa Iloilo City Council ang ordinansa nga naga-regulate sang mga tricycle sa siyudad.
Sa interview sang Bombo Radyo kay Councilor Sedfrey Cabaluna, chairman sang Committee on Transportation sa Iloilo City Council, iya ginpahayag nga nangin madugo ang proseso bag-o napasar ang ordinansa.
Suno sa konsehal, nagalab-ot sa 31 ka mga ruta ang ginhatag sa halos 2,000 ka mga tricycle unit sa siyudad.
Paathag niya, tikang ini para mas mangin mahapos sa Iloilo City Traffic Management Unit ang pagdakop sa mga colorum nga nagabyahe.
Ants napasar, makapila man ka beses nagsabtanay sanday Councilor Romel Duron kag Councilor Sedfrey Cabaluna.
Ini bangud nga luyag ni Duron nga maathagan sa mga pagtuon nga ginhimo ni Cabaluna antes ipasar ang nasambit nga ordinansa.
Sabat naman ni Cabaluna nga nag-agi sila sa ma id-id nga proseso kag ila ginkonsulta ang mga Presidente sang mga Tricycle, Owners and Drivers Association sa syudad.
Nanindugan naman si Duron nga indi preparado ang nasambit nga ordinansa kag nagboto ini kontra sa ordinansa.
Mahimo naman nga maka-apply sang prangkisa ang mga operators sang tricycle pagkatapos ma-publish ang ordinansa.
