Aprubado na sa third and final reading sang Sangguniang Panlalawigan sang Iloilo ang Active Transport Ordinance of the Province of Iloilo nga nagatuyo sa pag-establisar sang cycling lanes, bicycle parking facilities, kag pedestrian walkways sa probinsya.
Ini ang ginduso ni Iloilo Provincial Board Member June Mondejar kag gin-sponsor man sang pila ka mga board members.
Suno kay Mondejar, gina-enggayo sang ordinansa ang mga residente nga maglakat ukon magbisikleta bilang alternatibo nga transportasyon agud mabuligan nga mapahagan-hagan ang traffic congestion, masulosyonan ang vehicle emissions, kag mapasanyog ang ikaayong lawas sang publiko.
Pahayag niya, sa idalom sang ordinansa, ang Iloilo Provincial Government ang responsable sa pag-establisar sang cycling lanes kag pedestrian walkways sa mga provincial roads, samtang ang Department of Public Works and Highways ukon DPWH ang magadumala sini sa national roads.
Samtang, ang mga component city, munisipalidad kag barangay naman ang responsable sa mga dalan nga sakop sang ila tagsa-tagsa ka hurisdiksyon.
Gina-require man sang ordinansa ang pagbutang sang bicycle parking facilities sa mga government offices, public markets, eskwelahan, simbahan, transport terminals, shopping malls, restaurants, hotels kag iban pa nga mga establisyamento.
Ginpahayag man ni Mondejar nga ginalauman nga sugod Enero 2028, mangin requirement na ang bicycle parking facilities sa pag-apply ukon pag-renew sang business permits, kag sa pagkuha sang building kag occupancy permits.
Samtang, posible naman nga ma-exempt ang mga barangay micro-business enterprises kon wala sila sang available nga espasyo para sa sini nga pasilidad.
Dugang pa niya, ang Provincial Engineer’s Office naman ang magahimo sang nagakaigo nga design specifications para sa bicycle facilities sa mga bag-o nga gin-semento kag gin-aspalto nga dalan, lakip ang standard designs para sa pedestrian walkways kag bicycle parking facilities.
Nagapanawagan man ang koordinasyon sang nagkalain-lain nga government agencies agud masiguro nga nagakonektar sang husto ang mga cycling lanes kag pedestrian walkways sa provincial kag national roads.
