Nakapasar na sa 1st reading sa Sangguniang Panlalawigan ang ordinansa nga ginduso Board Member Carol-V Espinosa-Diaz agud matapna ang pagtaas sang kaso sang suicide sa probinsya sang Iloilo.
Sa interview sang Bombo Radyo kay Diaz, iya ginpahayag nga tinutuyo sang ordinansa amo ang paghatag sang igtalupangod sang lokal nga gobyerno sa nagataas nga kaso sang suicide sa probinsya.
Suno kay Diaz, nagakadapat nga sa mga kabarangayan kag sa mga eskwelahan, may yara na sang mga tikang agud matapna ang nasambit nga kaso bangud man sa nagkalain-lain nga mga rason.
May yara man suno kay Diaz sang pagatukoron nga mental health board nga magaserbe nga mayor nga komitiba kun mapasar kag mapatuman na ang ordinansa lakip na diri ang pagtukod sang 24/7 hotline agud magresponde sa mga emergency crisis nahanungod sa suicide.
Nagakadapat man suno sa natungdan nga may yara sang trained personnel nga magapalapit kag maga-istorya sa mga biktima nga may yara sang mental disorder kag depresyon agud indi na ang mga ini maghimo sang akto sang pagsuicide.
