ILOILO CITY – Lusot na sa third and final reading sa konseho ang pag-amyendar sa The Face Mask Ordinance sa syudad sang Iloilo.
Sa interview sang Bombo Radyo kay Iloilo City Councilor Ely Estante, proponent sang nasambit nga ordinansa, iya ginpahayag nga gin-aprobahan na kaina sang mayorya ang pag-amyendar sang nasambit nga ordinansa kun sa diin magluwas sa mandatory nga pagsuksok sang face mask, mandatory naman ang pagsuksok sang face shield ukon eye protector sa pampubliko nga lugar.
Suno kay Estante, mangin epektibo ang nasambit nga ordinansa 15 ka adlaw matapos ang publication sini kun sa diin, ginpataasan man ang silot sa madakpan nga violator apang exempted diri ang mga driver sang salakyan.
Ginpahayag ni Estante nga sa 1st offense, P1,000 ang multa kag community service, sa second offense naman, P3,000 ang multa kag community service samtang sa third offense, P5,000 ang multa kag community service.
Ang mga magpakatig-a sa pagbayad sang multa kag sa pagpaidalom sa community service ang pasakaan sang nagakaigo nga kaso.
Ang Office of the City Mayor na ang in-charge sa pagpabayad sang multa, paghatag sang community service kag pagpasaka sang kaso batok sa violator.
