ILOILO CITY – Ginpasiguro sang isa sa mga convenors sang grupo nga “Movement Against Tyranny” nga mangin malinong ang lapnagon nga hublag protesta nga hiwaton sa Setyembre 21 kadungan sang anibersaryo sang Martial Law declaration.
Sa interview sang Bombo Radyo Iloilo, ginpahayag ni ACT partylist Rep. Antonio Tinio nga madamo naman sang hublag protesta nga ginpatigayon sadto apang nangin malinong man.
Sabat ini sang mamalidha sa paandam ni Presidente Rodrigo Duterte nga indi siya magduha-duha nga gamiton ang puwersa sang layi kun magpanggamo ang mga raliyesta.
Suno kay Tinio, nagakabalaka sila nga ang mga pahayag nga ini sang administrasyon ang pamaagi para makondisyon ang utok sang publiko.
Ginpahayag sang mamalidha nga napamatud-an na nila ang taktika nga ini sang administrasyon sang magdeklarar sang Martial Law sa Mindanao.
Katuyuan suno kay Tinio sang ila anti-government protest nga ipalab-ot sa Duterte administration ang panawagan nga untatan na ang pagpatay kag ang pagpamatok nila nga liwat mapaidalom sa Martial Law ang pungsod nga amu kuno ang nakita nila nga padulungan sang pagdumalahan ni Presidente Duterte.