𝗖𝗘𝗕𝗨 𝗖𝗜𝗧𝗬 — Nagpabutyag sang kalipay ang mga organizers sang Palarong Pambansa 2024 bangud sa madinalag-on nga nagapadayon ang hinampang sa Cebu City kag kaiping nga mga Local Government Unit (LGU).
Sa interview sang Bombo Radyo kay John Pages, Chairman sang Cebu City Sports Commission, iya ginpahayag nga ang syudad ang nagahimo sang maayo bilang tagbalay sang pinakadaku nga pagtililipon sang mga student-athlete sa pungsod.
Suno kay Pages, apisar nga may mga pagpanghangkat pareho sa logistics, video streaming, kag koneksyon sa internet, ang mga organizer sang meet ang gilayon nga nakahatag sang solusyon.
Gin-ako niya nga bisan pa nga nakabaton sila sang nagkalainlain nga mga pagkabalaka kada adlaw angot sa mga billeting areas nga gina-istaran sang tagsa ka region, suno sa iya, gilayon nila ini nga naremedyohan.
Ang kalabanan sang mga pagpanghangkat amo ang hanungod sa kulang nga suplay sang tubig, kag barado nga mga kasilyas.
Gin-address man sang sini ang isyu sa posible kaso sang dengue kun sa diin ginreport nga may mga atleta nga nagpakita sang sintomas sang balatian nga dala sang lamok.
Suno sa iya, ginalantaw subong sang mga organizers sang Palarong Pambansa 2024 ang ila medical records.
Sa pihak nga bahin, ginpahayag ni Pages nga ginahulat pa nila ang mga report gikan sa technical committee sang Palarong Pambansa 2024 angut sa isyu sang track oval sa Cebu City Sports Center (CCSC).
Una na nga na-report nga ang rubberized track oval ang may duha ka metros nga kulang sa kinaandan nga 400 metros nga kalabaon.
Ginpasalig naman ni Acting Cebu City Mayor Raymond Alvin Garcia nga makig-istorya siya sa mga technical committees agud padasigon ang pagsolbar sang mga isyu sa palibot sang track oval.
Dugang pa, ginpahayag sang acting mayor nga mangin tuman siya ka estrikto, ilabi na sa transportation concerns kun sa diin, hugot nga bantayan ang mga taxi operators nga naga-overcharge sa mga delegado sang Palarong Pambansa 2024.
Nahibaluan nga nagakoordinar na ang natungdan sa Land Transportation Office (LTO) kag Land Transportation Franchising and Regulatory Board (LTFRB) agud magpatigayon sang imbestigasyon.
