ILOILO – Pabor si Board Member Domingo Oso Jr., Vice Chairman sang Committee on Transportation, Communication, and Public Utilities, sa jamming device nga ginbutang sang Bureau of Jail Management and Penology (BJMP) sa Iloilo District Jail (IDJ).
Sa interview sang Bombo Radyo kay Oso, iya ginpahayag nga daku ang mabulig sang device sa pagtapna sang mga kontrabado sa lugar, apang ila man sekyaron kon bala ginsunod sang BJMP ang ila permit nagikan sa National Telecommunication Commission (NTC).
Nahibaluan nga sa amo nga permit, awtorisado ang BJMP sa pagpahamtang sang signal jammer nga 15-20 meters radius ang range agud indi makapekto sa mga pumuluyo.
Suno kay Oso, amo ini ang ila kinahanglan siguraduhon, apisar personal nga nagapati sya nga mahina man gid ang signal sang mga telecommunication company sa Brgy. Nanga, Pototan sa diin nagapuyo ang mga residente nga nagpadangat sang reklamo sa signal jam.
Dugang pa ni Oso, aminado siya nga daku ang mabulig sang amo nga device sa pagpahagan-hagan sang socio-economic crimes lakip na ang iligal nga droga nga ginapasulod-pagwa sa prisuhan.
Iya ginpahayag nga sang una, may yara sang mga high-profile nga mga drug personalities nga naga-perform sang amo nga aktibidad kag ini ang mahimo bangud sa ila mga contact sa ila pamilya sa gwa gamit ang cellphone.
Dugang sang natungdan, amo ini ang ila luyag nga buligan tapnaon apang indi man pagbalewalaon ang reklamo sang mga pumuluyo sa signa jam, rason nga ginkasugtan sang komitiba nga mag-conduct sang ocular inspection sa amo nga prisuhan sa Martes, Nobyembre 19.
