ILOILO – Nagpaathag si Iloilo 4th District Board Member Domingo Oso Jr. sa panugyan sini kay Iloilo 1st District Board Member Jo-Ann Germinanda nga mag-inhibit ukon magpa-iway nga pamunuan ang imbestigasyon sa kaangot sa pagpasirado ni Vilma Sta. Cruz Getuya, iloy ni San Joaquin Vice Mayor Marvigrace Getuya Lago sang daan nga San Joaquin Mother and Child Hospital.
Si Germinanda ang naghatag sang privilege speech sa diin luyag sini nga paimbestigaran ang mga masunod:
-Pag-claim sang iloy sang bise alkalde nga nagapanag-iya sang duta nga ginatindugan sang ospital
-Indi pag-escort sang San Joaquin Municipal Police Station sa mando sang Local Chief Executive nga mag-upod sa mga empleyado sa ospital
-Indi pag-akto sang hepe sang San Joaquin Municipal Police Station nga si Police Captain Felix Perez sa kinagamo sa lugar
-Pagpahilabot sa isyu ni Purok 5 Punong Barangay Christopher Selibio
Sa interview sang Bombo Radyo kay Board Member Oso, iya ginpahayag nga bilang majority floor leader, indi sini luyag nga mamalisyahan ang Sangguniang Panlalawigan.
Suno kay Oso, santo sa ila internal rules, ang komitiba nga ginakaptan sang naghatag sang privilege speech amo mismo ang magaserbe bilang chairperson sa imbestigasyon.
Apang kuntani, kun luyag ni Board Member Germinanda nga mapabilin nga mangin objective kag credible, mahimo ini nga mag-inhibit.
Nahibaluan nga ginkasugtan naman sang Sangguniang Panlalawigan nga i-refer ang committee investigation sa Committees On Health and Sanitation nga ginapamunuan ni Board Member Germinanda, Public Order and Security nga ginapamunuan ni Iloilo 2nd District Board Member June Mondejar, Committees on Justice, Good Government and Human Rights nga ginapamunuan ni Iloilo 5th District Board Member Carol-V Espinosa-Diaz.
