Nagdugang ang Oton sa mga local government unit sa probinsya sang Iloilo nga nag-deklarar na sang state of calamity bangud sa pagsaka sang kaso sang dengue.
Sa interview sang Bombo Radyo kay Vice Mayor Jose Neil Olivares, 33 na sa 37 ka mga barangay sa banwa ang naka-rekord sang kaso sang dengue, magluwas lamang sa Abilay Sur, Batuan Ilaud, Galang, kag Turog-Turog.
Subong nga 2024, halin Enero 1 tubtob Agosto 10, nagdangat na sa 223 ang kaso sa amo nga banwa nga 248% nga mas mataas sa 64 nga napagkit sa amo man nga period sang 2023.
Suno kay Olivares, sa bulig sang probinsya, padayon ang ila monitoring kag pagpanawagan sa mga barangay official kag mga pumuluyo nga gub-on gid ang breeding places sang lamok particular sa 10 ka mga barangay nga nagapanguna sa may pinakamataas nga kaso.
Ini amo ang: Abilay Norte, Caboloan Sur, Trapiche, Caboloan Norte, Tagbac Sur, Santa Monica, Cagbang, Población South, San Nicolas, kag Pulo Maestra Vita.
Diri man nga mga barangay suno sa bise-alcalde magatutok ang lihok sa bulig sang quick response fund.
Antes ang Oton, nadeklarar naman ang state of calamity sa Passi City, Miagao, kag Tigbauan bangud man sa dengue outbreak.
Sang nagligad nga semana, ang Provincial Disaster Risk Reduction and Management Council (PDDRMC) ang nagrekomendar man nga ipaidalom na ang Iloilo province sa amo man nga status bangud pasado na ini sa criteria sang National Disaster Risk Reduction and Management Council (NDRRMC) para sa deklarasyon.
