Duha ka anggulo ang ginalantaw sang Oton Municipal Police Station nga motibo sa pagluthang sang riding-in-tandem suspects sa head security officer sang Iloilo Fish Port Complex sa Barangay Buray, Oton, Iloilo.
Ang biktima amo si Erwin Jordan kag ginapahayag nga naka-drive pa padulong sa police station kag nakareport sa pulis angot sa insidente.
Sa interview sang Bombo Radyo kay Police Captain Robert Jayson Pancha, hepe sang Oton Municipal Police Station, iya ginpahayag nga posible naulamid ang pangalan ni Jordan sa kontrobersyal nga pagluthang-patay kay Glen Peremne, ang pinuno sang Health and Sanitation Division sa Iloilo Fish Port Complex.
Si Jordan amo ang isa sa tatlo ka persons of interest nga gintumod sang Molo Police Station kaangot sa kamatayon ni Peremne sang Abril 23 sa San Juan, Molo, Iloilo City.
Suno kay Pancha, ginakonsidera man nila nga may kaangtanan ang natabo kay Jordan sa love triangle apang indi pa ini madetalye sang pulis.
Ginpahayag ni Pancha nga santo naman sa nakuha nila nga footages sa closed circuit television (CCTV) cameras sa diin natabo ang insidente, nakit-an nila ang mga riding-in-tandem suspects nga nakasuksok sang itom nga jacket kag helmet.
Gin-ako man sang pulis nga nabudlayan pa sila sa subong sa pagtumod sa mga suspek bangud wala pa nila nakuhaan sang statement si Jordan.
Dugang sang natungdan, indi man sila pagpahanugutan nga makabisita kay Jordan sa ospital, sa diin ini padayon nga ginabulong bangud sa mga ginapatuman nga istrikto nga health protocol.
Wala man ang biktima nagasabat sa tawag sang mga pulis.
Sa tion nga makakuha sila sang pahayag nagikan sa biktima suno kay Pancha, diri kag makaumpisa man sila sang proper investigation.
Nahibaluan nga nag-angkon sang pilas sa abaga ang biktima.
Samtang, gin-athag naman sang legal counsel ni Erwin Jordan nga wala sang kaangtanan sa love triangle ang natabo sa biktima.
Sa interview sang Bombo Radyo kay Atty. Sheila Olid, iya ginpahayag nga madugay na nga mag-abyan ang pamilya sang iya kliyente kag ang pamilya man sang ginadul-ong kag ginasugat sini nga co-worker sa Sta. Felomina Subdivision, Oton, Iloilo.
Suno kay Olid, bangud sa COVID-19, masami na lamang nga nagapadul-ong kag nagapasugat ang katrabaho sang iya kliyente bangud madugay naman nga close ang mga pamilya nila.
Dalagko naman suno sa abogado ang kabataan sang pamilya sang katrabaho sang iya kliyente nga si Jordan rason nga indi na nila luyag nga maulamid ang mga ini sa isyu.
May kaangtanan naman sa alegasyon nga nagalapta sa diin ginapahayag nga ginframe ni Jordan ang pagluthang sa iya agud nga madula ang iya pangalan bilang isa sa persons of interest nga gintumod sang Molo Police Station kaangot sa kamatayon ni Glen Peremne, hugot nga ginpaathag ni Olid nga wala ini sang kamatuoran.
Nagapati ang natungdan nga base sa pilas nga naangkon sang iya kliyente, yara sa alang-alang ang kabuhi sini rason nga indi posible ang amo nga alegasyon nga ginahaboy batok sa biktima.
Sa subong suno kay Olid, natalana naman nga ipaidalom sa operasyon si Jordan kag masami nga ginatublukan sang pain relievers rason nga indi pa ini makasabat sa tawag sang mga pulis agud makahatag sang pahayag.
Matandaan nga sa Bakhaw, Mandurriao nagapauli si Jordan apang nagdul-ong ini sang iya co-worker sa Sta. Felomina Subdivision sang adlaw nga natabo ang pagpangluthang.
Sang pabalik na sa banwa sang Oton, didto kag naglabay ang riding-in-tandem suspects, gintiro ang biktima, kag gilayon nga nagpalagyo.
Wasak naman ang windshield sang salakyan ni Jordan.
