Oton MPS, may yara na sang 2 persons of interest sang pagpangawat sa isa ka eskwelahan sa banwa sang Oton, Iloilo

Iloilo – May natumod na nga duha ka persons of interest ang Oton Municipal Police Station may kaangtanan sa nagluntad nga pagpangawat sa Oton Elementary School sang Enero 15.

Sa interview sang Bombo Radyo kay Police Major Fernand Limbungan, hepe sang Oton Municiapal Police Station, iya ginpahayag nga gina-develop pa ang imbestigasyon sa identidad sang mga suspek.

Suno kay Limbungan, may yara naman sang rekord nga kaangay nga kaso ang mga suspek sa banwa.

Kun balik-balikan, nagpabilin pa sang mensahe ang suspek sa black board nga nagasiling: “Pasensya na, wala kaming bigas, kami ang magnanakaw”.

Matandaan nga nakuha sang mga suspek ang lima ka mga electric fan, isa ka aircon, kag isa ka flat screen television halin sa lima ka classrooms kag sa Parent Teacher Association Office.

Nag-abiso naman si Limbungan sa eskwelahan nga magpakabit sang closed-circuit television camera kag mag-hire sang security guard agud mabantayan kag ma-secure ang eskwelahan.