OTON ILOILO– Padayun nga ginapadalman sang Oton Municipal Police Station ang imbestigasyon tuhoy sa nagluntad nga pagdis-arma sa security guard sang SCMIX builders batching plant lakip na ang pagpanghalit sa equipment kag salakyan nga nahamtanag sa Brgy. Pulo Maestra Vita, Oton Iloilo.
Sa interview sang Bombo Radyo kay Police Major Gervenson Muyo, hepe sang Oton Municipal Police Station, iya ginpahayag nga padayun nila ginahibalo ang identity sang duha ka mga suspek nga nakasuksok sang fatigue kag naka-bonnet nga nagsulod sa batching plant.
Suno kay Muyo ila na ginapangreview ang mga kuha sang close circuit television agud makilal-an na ang mga suspek nga nagpaniro kag nagpang-agaw sang armas.
Suno kay Muyo, indi pa nila masigurado kun ano ang matuod nga motibo sang duha ka mga suspek sa pagpaniro sang mga kagamitan sang planta lakip na ang pagpaarak luthang sa salakyan sang manager nga nakapark sa nasambit nga lugar.
Nahibaluan nga ginkakibot sang gwardya nga si Jogie Java ang natabo nga pagsulod sang duha ka suspek lakip na ang pagpang agaw sang iya armas kag pagpangluthang sa equipment sa diin nahalitan ang salakyan sang manager nga si Jeremia Rubio, winged van sang planta, goma sang pison, bunk house sang mga empleyado, kag tanke sang krudo.
Gindala man sang duha ang service firearm sang gwardya nga ginalakipan sang 9mm kag shotgun.
Maswerte naman nga wala sang mga ini ginsakit ukon ginhalitan ang gwardya.
