Ginpalikaw lang anay sang Oton Municipal Police Station (MPS) sa iya pamilya ang amay nga suspek sa pagpatay sang iya bata sa Barangay Sta. Rita, Oton, Iloilo.
Ang biktima amo si Raymundo Sarad, Jr., 36-anyos, samtang ang suspek amo si Raymundo Sarad, Sr., amay sang biktima, kag lunsay residente sang nasambit nga lugar.
Sa interview sang Bombo Radyo kay Police Captain Lunelyn Talamillo, deputy chief of police sang Oton Municipal Police Station, iya ginpahayag nga kasunod sang pag-release sa suspek, wala na ini ginbalik pa sa ila balay sa Oton.
Suno kay Talamillo, gindala ang suspek malayo sa ila banwa agud nga makalikaw sa pamilya.
Ginpahayag man sini nga wala pa nakaabot ang autopsy result sang biktima kag ginahulat-hulat na lang sang talatapan.
Nahibaluan nga apisar nga wala nag-ako ang amay sa otoridad nga siya ang nakabuno sa iya anak, nagtuad naman ini sa iya kabataan sa nahimo nga krimen.
Matandaan nga nasapwan ang biktima nga yara na sa kanal kag may pilas nga tuga sang pagkabuno.
