Ginahibalo pa sang Oton Municipal Police Station ang identity sang driver sang awto nga ginaalegar nagtuyo nga mag-abduct sa tatlo ka mga kabataan.
Ang mga bata ang lunsay residente sang Barangay Cagbang, Oton, Iloilo kun sa diin isa ang 13-anyos kag duha ang naga-edad sang 12-anyos.
Sa interview sang Bombo Radyo kay Police Captain Lunelyn Talamillo, Deputy Chief of Police sang Oton MPS, iya ginpahayag nga naglagaw sa Sunset Boulevard ang tatlo antes natabo ang insidente.
Santo sa ila nga gin-report sa pulis, ginpamangkot sila sang ginabanta 30-anyos nga driver kun sa diin ang alagyan pakadto sa Oton kag gintanyagan man nga magsakay na lang bangud ihapit na lang niya ang mga ini.
Nagsakay man ang tatlo, apang pag-abot sa Emerald Estates kun sa diin manaog na kuntani, gina-alegar nga wala nagpundo ang driver gani nga ginbuksan sang bata sa likod ang pwertahan kag naglukso. Nagsunod man ang bata sa front seat nga nagbukas man sang pwertahan kag naglumpat.
Suno naman sa bata nga nagapungko sa likod sang driver, nagpakitluoy ini nga manaog siya kag nagpundo man gilayon ang driver, nagpanaog ini, kag naglakat man ang salakyan.
Suno kay Talamillo, may slight injuries ang mga bata bangud sa ginaalegar nga paglumpat.
Indi matandaan sang mga bata ang nawong sang driver apang ginapahayag nga gray ang awto nga gina-pangita na subong sang awtoridad paagi sa pag-backtrack sa closed circuit television footages.
Gin-athag sang kapulisan nga gina-imbestigaran pa kun ano gid man ang motibo sang driver nga ginapahayag nga nag-resulta gid sa pagkapuhag sang mga menor de edad.
