ILOILO CITY – Ginatipon na sang Jaro PNP ang mga ebidensya agud nga makilala ang mga suspek sa pagluthang patay sa anay job hire sang Iloilo City Hall sa Brgy. Tabuc Suba, Jaro, Iloilo City.
Sa interview sang Bombo Radyo kay Police Captain Eduardo Siacon, hepe sang Jaro Police station, iya ginpahayag nga ila pa nga ginatipon ang mga kuha sang Closed Circuit Television camera agud nga makilala ang mga suspek nga nagluthang-patay sa biktima nga si Felix Argenal Jr., 30, sang Zone 3. Brgy. Tacas, Jaro, Iloilo City.
Suno kay Siacon, mahimo nga malapit ang distansya sang gunman santo sa pilas sa ulo, likod kag nawong sang biktima.
Ginpahayag ni Siacon nga sa subong, ila na nga ginahibalo ang background sang biktima agud nga masolbar ang kaso.
Samtang, magluwas nga anay drug surrenderee, naulamid man sa pila ka krimen sadto ang biktima nga si Argenal.
Suno kay Siacon, nangin suspek si Argenal sa isa ka shooting incident apang wala nadayon ang pagpasaka sang kaso.
Magluwas diri, ginatudlo man si Argenal nga miyembro sang gun for hire kag ginadudahan nga amo ang nagpatay sa driver sang Department of Agrarian Reform 6 nga si Allan Salario.
Ginpahayag ni Siacon nga bisan wala pa nasolbar ang kaso sa pagpatay kay Salario apang natukiban sa imbestigasyon nga ang suspek ang may yara sang tattoo sa paa nga nagasanto sa identity si Argenal.
Gin-athag sang natungdan nga indi pa makumpirma ang nasambit nga akusasyon bangud nga nagapadayon pa ang imbestigasyon.
