ILOILO – Gindula sang Police Regional Office 6 ang kahangawa sang mga pumuluyo sang Janiuay, Iloilo kasunod sang natabo nga engkwentro sa tunga sang tropa sang gobyerno kag rebelde nga grupo kun sa diin ginbawi-an sang kabuhi ang pinuno sang Reconnaisance Company sang Regional Mobile Force Battalion 6 nga si Police Captain Efren Espanto Jr.
Kadungan sang nasambit nga pasalig, ginhingyo man sang otoridad ang mga pumuluyo nga magbulig agud nga mauntat na ang problema sa insurhensya kag ang natabo kay Espanto ang mangin eye-opener sa tanan.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga indi masolbar ang problema sa insurhensya kun ang otoridad lang ang nagahimu sang paagi agud nga matapna ang nasambit nga problema.
Suno kay Malong, isa sa mga rason kun nga-a nag-ibwal ang rebelde nga grupo amo ang Task Force to End Local Communist Armed Conflict nga isa ka whole nation aproach agud mauntat ang insurhensya.
Ginpanawagan man ni Malong sa mga miyembro sang rebelde nga grupo nga magsungka bangud nga may yara sang benepisyo nga igahatag ang gobyerno.
