ILOILO CITY–May mga persons of interest na ang mga otoridad nga makabulig sa pagsolbar sa pagbuno-patay sa barangay tanod sang La Fortuna, Barotac Viejo, Iloilo.
Suno kayPolice Chief Inspector  Joven Arevalo, hepe sang Barotac Viejo Municipal  Police Station, iya ginpahayag nga bag-o pa man ang krimen, may naghagad pa kay Brgy. Tanod  Ronel Canadilla nga magpadulong sa banwa sang Banate, Iloilo.
Suno kay Arevalo, indi pa nila mapangalanan ang nasambit nga mga persona.
Mahimo nga nagpalagyo pa ang biktima sa mga suspek bangud man sa nakit-an nga tulo sang dugo sa dalan kag talamnan sa diin nakit-an ang barangay tanod.
Nahibaluan nga ang biktima ang nag-angkon sang pilas sa nawala nga kilid, ilok, dughan kag sa kamot.
Magluwas diri, nakit-an man sa natuo nga kamot sang biktima ang isa ka balisong ukon batangueño.