ILOILO – Mas daku na ang kahilwayan sang mga local goverment units (LGUs) nga maka-comply sa advance payment requirements sang mga pharmaceutical firms sa luwas sang pungsod nga nagahimo sang COVID-19 vaccines.
Ini matapos ginkumpirma sang Malacañang nga ginpahanugutan na ni Presidente Rodrigo Duterte ang LGUs nga makabayad sang masobra 15% sa total cost sang pagabaklon nga Covid-19 vaccines.
Una na nga ginpahayag ni vaccine czar Carlito Galvez Jr. nga ang 15% nga limit nga una na nakasaad sa Implementing Rules and Regulations sang Government Procurement Reform Act amo ang isa ka daku nga pagpanghangkat sa national government bangud nagahingyo ang mga pharmaceutical firms sang masobra 50% nga bayad sa advance market commitments.
Sa interview sang Bombo Radyo kay Iloilo Governor Arthur Defensor Jr., iya ginpahayag nga ang advance payment ang isa man sa mga requirements sang nagpirma ang Iloilo Provincial Government sang multilateral agreement kaupod ang national government kag British–Swedish multinational pharmaceutical company nga AstraZeneca.
Bangud sang Memorandum 51 nga gin-isyu ni Presidente Duterte subong nga adlaw, Pebrero 18, maka-proceed na ang mga LGUs sa pagbakal sang bakuna nga amo man ang maka-cover sang mga nasakupan nga pumuluyo sa ila tagsa ka lugar.
Sa una nga batch sang libre nga 117,000 doses sang Pfizer vaccines nga i-deliver sa Pilipinas paagi sa COVAX global facility, indi man sigurado suno kay Defensor kun maabtan sini ang Iloilo. Ini ang rason kun ngaa may inisyatibo ang Iloilo Province nga magsulod sa multilateral agreement para sa initial purchase sang 270,000 doses sang Astrazeneca vaccines nga ginalauman naman nga magaabot sa ikaduha nga quarter sang tuig 2021.
Wala pa sang official survey ang probinsya agud matumod kun pila ang handa nga magpabakuna kag kun pila ang nagapamatok apang padayon subong ang registration sa municipal level para sa vaccination program.
Bwas, Pebrero 19, may yara sang simulation exercise (SIMEX) ang Iloilo Provincial Government para sa COVID-19 vaccination nga patigayunon sa banwa sang Oton kag pasakupan sang 100 ka mga frontliners.
